dede qorqud
Sunday, July 11, 2004
قورقود دده مه نيسگيللي سؤزلريم
بولوت قاراچورلو (سهند)
وئب اوچون حاضيرلايان: گجيل
http://www.Gajil.20m.com
گئجه دير، عالمه چؤكوب قارانليق
اوفوقلر تاپدانيب٬ يئره يامانيب
هر يان، قوو وورورسان قولاق توتولور
فيكير ده، دويغو دا، دونوب دايانيب
آي كوسوب٬ اوز قويوب زؤهره يه ساري
گونش يولوب٬ توكوب زرلي ساچلارين
ظولمت بايراق آچيب يئرين اوزونده
دَييشيب عالمين قايدا- قرارين
بير چاققال دا هورمور، قورد دا اولامير
بايقوشلار دا باشين چكيب قينينا
اؤلوم قاناد گريب يئرين اوزونه
هر شئي شوبهه له نير وار اولدوغونا
كؤوشني بوروين سوكوت اليندن
سوكوت جانا دويور، فريادا گلير
داريخيب هؤوكوروب هاراي چكيرم
دره لر ديسكينيب، داغلار ترپه نير:
- اولدوزلو گؤيلره – آيلي گؤيلره
قوزقون كيمي قاناد گره ن بولودلار!
دومانلار ايچيندن، چنلر ايچيندن
جانيخميش بير اينسان سيزي هارايلار!
اهريمنلر، دوزاق قوروب يولومدا
قورخورام- قورخورام من قارانليقدان!
ديشين شاققيلدادير، بره لدير گؤزون
هر كولون ديبيندن، منه بير شئيطان
گونشي سالسا دا گئجه قويويا
يئنه ده گؤيلرده، اولدوز وار، آي وار
دئيرلر گئجه لر يولدان آزانلار
اولدوزلارا باخيب، يولونو تاپار
چكيلين، چكيلين، چكيلين آمان!
عؤمرومون گؤيوندن چكيلين بير آن!
قويون ايشيق سالسين يوللاريما آي
يولومو سوروشوم من اولدوزلاردان
اولدوزلار، اولدوزلار، آمان اولدوزلار
ندن گؤز باسماييب پاريلداشميرسيز؟
هارداسيز؟ هارادا ايتيب باتيبسيز؟
نييه ساكيت- ساكيت پيچيلداشميرسيز؟
يوخسا باتلاقليغا باتيبدي ((بهرام))؟
((كئيوانين)) غوصصه دن بوكولوب بئلي؟
((اولكرين)) سالخيمي پوسگوندن دوشوب؟
((زؤهره)) نين سازينين قيريليب تئلي؟
سانكي بولوتلار دا يوخويا باتيب
بختيمدن گؤيده بير شيمشك ده شاخماز!
بوستانچي بابا دا باش آتيب ياتيب
چاخماغيني چالماز، فنارين ياخماز!
اولدوزلار اوزاقدير، سمالار درين
اينسانا يئردندير وارسا هر هاراي
يوز بئله باغيرسام، سيتقاسام دا من
يولونو ديَيشمز گونش، اولدوز، آي
هله ليك بو منم، بو دا قارانليق
گؤزلريم بره لير قارا ظولمته
باشين قارانليغا دؤيور باخيشيم
بلكه بير يول آچا نورانييته
آنجاق هر گئجه نين دالي گوندوزدور
هر بير فلاكتين قورتولوشو وار
حياتين يوللاري دره- تپه دير
هر يئنيشين ايسه، بير يوققوشو وار
اوره ك چوخ دردله نير، گؤز چوخ ياشارير
لاكين حيات بوتون درد-و غم دئييل
بو آجي گونلرين، شيريني ده وار
عؤمور تك توي دئييل، تك ماتم دئييل
هر دردين داواسين آختارماق گره ك
نه چيخار ييخيليب زاريلداماقدان؟
تلاشسيز قوللارين قوووتي اولماز
يول گئتمه سه٬ چاتماز مقصده اينسان
سحري آختاران گئجه دن قورخماز
آليرام اليمه تلاش عصاسين
اگر گؤيدن يئره قطران ياغسا دا
اوزوب گئچمه لىيم ظولمت درياسين
اوميد هر نه قده ر ضعيف اولسا دا
بوتون دويونلري بوشالدار، آچار
اوميد بير قيغيلجيم، بير قور اولسا دا
تونقاللار يانديرار، آلوولار ساچار
يئنه باغيريرام، هاراي سسيمدن
دره لر ديلله نير، داغلار سسله نير
يئر- گؤي فرياديمدان زينهارا گلير
قايالار ديسكينير، داشلار ترپه نير
سانكي بير ايشارتي گؤز وورور منه
اوزاقدا جانسيز بير ايشيق پارالايير
ائله بيل گئجه نين او دويا بيلير
يا دا قارانليغين باغري چاتلايير
ايشيقدان اوزانان ضعيف شوعالار
باغلانير كؤنلومه قيزيل بير ساپ تك
مني ده اؤزويله چكير آپارير
او بير يوماق كيمي، سريتله نرك
قاپي- پنجره سيز بير آبيده ده
هانسي نييازلي ال بير شام يانديرميش
مؤحتاج بير كؤنولون بوش ايلتيجاسي
بو سؤنوك اوجاغي ايشيقلانديرميش
بوردا كيم وار منه يول نيشان وئره؟
بير برباد بنادير، بير قورتارميش شام
بو شام چكر اولسا سون نفسلرين
موطلق قارانليقدا، بوغولاجاغام
هيسلي تاخچالاردا، ساخسي پوسوزلر
اوستونه قات با قات توز- تورپاق قونوب
ياخيلان شاملارين ايستي گؤز ياشي
تؤكولوب، هر ياندا لاي با لاي دولوب
بوردا بوز باغلاييب٬ دونوبدور داشا
حاجتلي گؤزلرين تؤكدويو ياشلار
باغلي دويونلري آچانماسا دا
منيم گئجه مي كي ايشقلانديرار
توزلو پوسوزلري پيىله دولدوروب
يانديريرام، شامين سون شؤعله سينه
بير آندا آبيده چيراغبان اولور
سؤندويو شاملارين، گودازه سيله
ايشيق قارانليغي قووور ائشييه
گؤرونور بير سككيز بوجاقلي بنا
اؤنومو قورودير(؟) مرموز بير جذبه
كؤنول مفتون اولور باخديقجان اونا!
تاخچالاردا ييغيم- ييغيم كار- كاغاذ
جيليدلي- جيليدسيز، كؤهنه كيتابلار
باسيليب باشينا تورپاق اله ييب
زامانلاردان اسيب گلن روزگار
ساوادسيز، يازيسيز٬ ساده ائللرده
قديملردن قالان بير عادت ده وار
او هر جور كيتابا، هر جور باسقىيا
ندنسه موقددس گؤزويله باخار
اونا حؤرمتلىدير هر يازي، هر خط
نه يانديرماق اولار، نه آتماق اولار
((شؤبهه لي اللردن)) ائحتيراز دئيه
قاچيردار مسجيده، اوجاغا قويار
اونا گؤره ده بو بئيغوله لرده
بعضن دوغرودان دا آبيده لر وار
اينسان دويغوسونون خزانه لرين
بو ويرانه لردن، آختارماق اولار
گاهدان دا گؤرورسن بير موجاويرين
فاجيعه قوپارار زييانكار الي
آنلاماز- آنلايار يئر قازار٬ قويلار
كار- كاغذ قاريشيق، بو اينجىلري
ايچيمده درين بير آختاريش حيسسي
((كيتابلاري آختار)) دئيه- باغيرير!
ائله بيل گؤرونمز بير سس، بير نيدا
تاخچانين ايچيندن مني چاغيرير
كيتابلاري بير- بير آچيب باخيرام
جور به جور قورآن دير آنجاق چوخوسو
بير آن نفسيمي دالي قايتارير
قالخان توز- تورپاغين آجي قوخوسو
بو دا، مئشين جيليد٬ قالين بير بياض
دئيه سن، كؤهنه بير ال يازماسىدير
بوز وراقلارينا قونان لكه لر
تك توز- تورپاق دئييل، زامان پاسيدير
توستولو پوسوزون دار ايشيغيندا
آچيرام قارشيما كؤهنه بياضي
بورنومدا كيفسه ميش كاغذين اييي
گؤزومو اوخشايير گؤزه ل بير يازي
گؤزوم دولانديقجا وراقلاريندا
بياضدان بير قاپي آچيلير منه
قاپيدا سانكي بير آت باغلانيبدير
مني آپاراجاق باشقا عالمه
خياليم سيچرايير آتين بئلينه
باخيشلاريم جيلوو، گؤزلريم يوين
يورتورام كئچميشين درينلرينه
چاپاراق چيخيرام زامان قئيديندن
گونلر، آيلار، ايللر دالي قاييدير
قالخير مزاريندان اولو بابالار
قاريجيق آنالار قوللارين آچير
مني قارشيلايير ائللر- اوبالار
آدامي تانييان يئرده قورد يئسين
هاميسي بير به بير اوزومدن اؤپور
اوروز)) پيچيلدايير ((دلي دوندار((ا)):
" بيلمم نئچه مينجي نوه سييم من"
آذرلر يوردونون شن دوزلرينده
آلاجا سئيوانلار يئنه قورولور
شرفيمه بؤيوك قوناقليق اولور
دوه لر كسيلير، قويون قيريلير
ايتي شرابلارين آغزي آچيلير
اوجاقلار ياخيلير، كابابلار پيشير
هر آن يئني دسته يئتيشير يولدان
ارنلر، خاتينلار آتلاردان دوشور
اللرده صوراحي اينجه گؤزللر
سو سوناسي كيمي سوزور- ساللانير
دولوب بوشالديقجا زر پيياله لر
ياناقلار گوللنير، توتور- آللانير
جئيران سوروسو تك قيزلار- گلينلر
گولوشور، قاچيشير چمنلر اوسته
گاهدان توپلانيب دؤوره قورورلار
الوان چيچك كيمي دسته به دسته
اردملي ايگيتلر، قادين آنالار
كيمي صؤحبت آچير، كيمي ساز چالير
كيمي آت اوينادير، كيمي اوخ آتير
ائلين شنليك سسي عرشه اوجالير
گؤره ك كيملر گلير قوناقليغيما؟
عصرين آدلي- سانلي قهرمانلاري
قاريجيق آنالار، قوجا بابالار
اوغوز سويلارينين، اولو خانلاري
((بايينديرخان)) گلير، ((بيگ اوروز)) گلير
((قارا گونه)) گلير، ((خان قازان)) گلير
((قييان سلجوق)) گلير، ((بيه رك)) گلير
((دلي دومرول)) گلير، ((بوغاج خان)) گلير...
معريفت يولونون آيدين چيراغي
قوجالار قوجاسي، ائللر آتاسي
بئزن ميسكينلرين اوميد داياغي
بوتون موشكللرين موشكولگوشاسي
((قورقود دده)) گلير الينده قوپوز
اودوملو اليني آرخاما چالير:
- اوغول ائللريوه خوش گلدين دئيير
هر طرفدن آلقيش سسي اوجالير
باخيرام ائليمه، بابالاريما
باخديقجا فخريمدن باشيم اوجالير
اؤز گونوم، طالئعيم گلير اؤنومه
گؤزوم آياغيما تيكيلي قالير
اؤپورم دده نين جؤمرد اليني:
- آتا، اوغلون هيممت ديله يير سندن
بيل كي ائللريمين حالي ياماندير
اسيرگه مه خئير دوعاوي مندن
زاماندير بيزلره فلك گؤز اَييب
پولاد اوز قيلينجلار قيندا پاسلانيب
شاهباز آيغيرلارين پييى كسيليب
جيدالار اَييليب، كندير اوفانيب
اودالار تالانيب، ائولر ييخيليب
مرد ايگيتلر اؤلوب، اوره ك داغلانيب
حيصارلار آلينيب، اوردو باسيليب
دوداقلار تيكيليب، قوللار باغلانيب
آلتينلي بان ائولر، تالانا گئديب
ائو يييه سي گئجه كوچه ده ياتير!
بوز بالتاسي كيمي جؤمرد ايگيتلر
ديوارلار ديبينده پورتاقال ساتير!
كؤلگه لي آغاجلار كؤكدن قورويوب
بولاقلار كورلانيب، كهريزلر باتيب
آليجي قوشلارين قانادي سينيب
آسلان ياتاغيندا تولكولر ياتيب
اوبالاردا نه توي٬ نه بايرام اولور
نه قوپوز چالينير، نه مرد اؤيونور
نه بير اوزان گلير٬ نغمه اوخويور
نه بدوو آتلارين ايچي دؤيونور
لاله لي دوزلرده تيكان گؤيه ريب
نه قوزو مه له شير، نه جئيران قاچير
قوشلار دا يوردومدان كوسوب گئديبلر
گؤيده نه بير دورنا، نه سونا اوچور
معيشت ايگيده آغير يوك اولوب
كيمي باش گؤتورور گئدير سرگردان
كيمي بالالارين آلير ديشينه
قاچير ديياريندان، دوغما يوردوندان!
دوو دوشوب ديرناقسيز نامرد الينه
ديشي باتان يئرين اتين قوپاردير
ديل آچيب ديلينده دانيشانلارين
چكير بوغازيندان ديلين چيخاردير!
بيرجه دار گونلرين دار آخشاميندا
خالقين احوالينا شفق قان آغلار
قهرمان ائليوي نه گونه سالميش
گؤر بو قارا دؤوران، گؤر بو روزگار
بير اوره ك آرادان ايكي بؤلونوب
آياق دا قانليدير، باش دا قانليدير
آغ ساچلي آنالار قارا گئيينيب
ياناق دا قانليدير، ياش دا قانليدير!
اوتانيرام سنه ((اوغلونام)) دئيم
بيليرم يانيندا قارادير اوزوم
(؟)دردي من ائشيدني سن
سن دؤزنمه ينده، من نئجه دؤزوم؟
وطنين شاماماسي
دوغرانيب ديليم- ديليم
تيكيليب دوداغيم
قاداخلانيب ديليم
هر پارچام، هر تيكه م
بير قورد آغزيندا!
بابامين كسگين قيلينجي
پاسلانيب، چورويوب قيندا
...
نامحرم قوجاغيندا!
مرد ايگيتلريم داردا
بو ديياردا، او ديياردا
...
((آذرلىيم)) دئين
پاپاغي قيللي- قيلچيقلي
اوز- گؤزو سنگر پالچيقلي
دؤنمز جؤمردلريم...
بيلميرم هاردادير...
هار.... دا....
قولاق آس آتا!
بو دردلي اوغلووا قولاغ آس!
هانسي درديمي دئييم؟
هانسي نيسگيليمي دئييم؟
سيزدن سونرا نامردلر
دوغراق- دوغراق
دوغرادي ديياريمي
دوغراديلار ايرانيمي...
بير ووروشدا
اؤزون، اوغلون، نوه سين
قوربان وئردي ((شئري)) بابام...
...
آلانماديم قانيمي
بير ده كي نانكورلار
بير قورو ديليمي ده منيم –
اليمدن آلديلار
بير قاريش يئريمدن ده
مني باييرا سالديلار
هاراي قوپارتديم
جان آتديم
اولمادي- اولمادي
ايندي...
اوروشده بدوو آت شيهه سيندن
نر اوغول نعره سيندن
سس سمير يوخدور
اللرده قالان آنامين
هاي... هاراي چكمكدن
چيخدي جاني:
بابكيم، كوراوغلوم، شاه ايسماعيليم ها... ني؟
****
دده ملول- ملول باخير اوزومه
باخيشيندا آيدين بير اينجيكليك وار
اؤولادين پريشان، ناتوان گؤرسه
شوبهه سيز هر آتا موكددر اولار
اوغول نييه مندن هيممت ايسترسن؟
تورپاق اسيرينين الينده نه وار؟
هر عاشيقين بئش گون دؤوراني واردير
هر عصرين اؤزونون بير ((قورقود))و وار
كيم اؤز ثروتيني قبره آپارميش؟
يا هانسي آتاني گؤردون دونيادا
عؤمرونده چاليشيب قازانديغيني
بوراخيب گئتمه يه آخير اؤولادا؟
من اؤز حياتيمدا هر نه قازانديم
عاغيلدان، كمالدان، عئلم و ذكادان
توخوم ائيله ييبن بو يئرده اكديم
سيزلره تاپشيرديم اؤلدويوم زامان
آنجاق هر اوغولون اؤزونه قالير
آتا ثروتيندن نه جور بارينا
بير گونده كول ائديب گؤيه سووورا
يا دا كي قات- قات دا، آرتيرا اونا
بيز اگر باش اوجا، ايگيت ياشاديق
نامرده اَيمه ديك اونو هئچ زامان
ياد ائللي دوشمانا تسليم اولماديق
قانيميز آخديسا داماريميزدان
دؤرد اللي توتماديق بيز بو دونياني
حياتي شرفده، مردليكده بيلديك
ياشاديق شرفلي ياشاماق اوچون
ساواشديق، ووروشدوق، اؤلدوردوك، اؤلدوك
گؤيلره يورد سالديق قاراقوش كيمي
قارقا قوزغون اولوب، لئشه قونماديق
آسلان تك جب لرده ياتاق ائيله ديك
تولكو تك گونده مين كلك يونماديق
نامرده مرد اولدوق، حاققا قول اولدوق
ياخشىيا، ياخشي اولدوق، يامانا، يامان
السيزلري ازيب آياقلاماديق
آمانسيز دوشمانا، وئرمه ديك آمان
اوغولا نه گرك دده نين مالي
اگر اوغول اولسا، اگر مرد اولسا!
آتانين ثروتي هارا چاتاجاق
اوغول دده سينه يامان درد اولسا!
آتانين آديني باتيران اوغول
آتانين يوردوندا قالماسا اييدير
ايگيتده، ايگيت ليك، ناموس، عار گرك
ناموسسوز اوغولللار اولماسا اييدير!
اوغول نييه مندن هيممت ايسترسن؟
تورپاق اسيرينين الينده نه وار؟
هر عاشيقين بئش گون دؤوراني واردير
هر عصرين اؤزونون بير ((قورقود))و وار
من اؤز زمانه مي ياخشي تانيديم
ياخشي يول گؤسترديم، ياخشي يول گئتديم
ائليمه اوستاد بير گميچي اولدوم
توفانلاردان كئچديم، ساحيله يئتديم
سن ده اؤز عصريوي دريندن تاني
گز- دولان زامانين ((قورقود))ون آختار
راكئت دؤورانيندا، آتوم عصرينده
اپريميش ((قورقود))دان سيزه نه چيخار؟
هر زامان باش اوجا ياشاماق اوچون
او عصرين هونرين اؤيره نمك گره ك
آتايا گوونمك هونر دئييلدير
دونيادا هونره گوونمك گره ك
گئت قوجا دده دن هيممت ديله مه
هيممت وئره جكسن، هيممتين اولسا!
آتاوين چيراغين يانار ساخلارسان
شرفين، هونرين، غئيرتين اولسا!
منيم ده اليمدن بو گلير آنجاق
سني كئچميشينله ائيله يم تانيش
باش اوجا ياشاماق ايسته سن اگر
باخ گؤر بابالارين نئجه ياشارميش
من بو دونيالاردا گزيشن زامان
بيلميرم نه ساعات يوخوم آپارير
يا منيم كؤنلومو رؤيالار آلير
يادا كي پوزوسون ياغي قورتارير
بير زامان آييلديم٬ آچديم گؤزومو
ايشيق قارانليغي باسيب بوغوردو
گئجه نين شلمه سي قانا باتميشدي
سحر آچيليردي، گونش دوغوردو
((دده مين)) اپريميش، توزلو كيتابين
بير آبيده كيمي قوجاقلاميشديم
گئجه مي سحره چاتديرميشديمسا
بير وراقدان آرتيق اوخوماميشديم
سون
